Mix-Up an Blenda Fambily an Tambareen Nation large up unu self. A how wi a pressure dem suh?! Some fool waan fight gainst di mix-up ting cause wi a step up inna life an wi have dem file, but a pity dem nuh know what's in store fi dem. Watch an see. Anywayz, see 2 mix-up ya.
Damn Eediat!!
Raga, big up the gal from Spanish Town weh sey she pregnant fi man from Mandeville. Now Raga, dis gal call de man an tell him sey she pregnant, de mam was so glad that de man go wok de money & buy a bath set fi de gal. When de man lef go Spanish Town an call har an tell her sey him bring some things fi the baby, she tell de man sey she deh a town so him fi leave de things dem wit har fren a one stall.
Raga, de man leave de things dem & go back to Mandeville. Den de gal neva do notten but call de man & ask him if him leave any money wit har fren. De man sey yes him leave $1,000. Afta three months de man call har & tell har sey him a come look fi har. She say yes an de man go up a Spanish Town. Raga, a wen de man reach up there & call sey him a come to har yaad de gal tell him sey she get emergency call so she deh a MoBay a 1 a har people dem yaad wey dead. Raga, de gal clown out de man all de time! De next time she call de man she sey she deh a hospital a have baby. De man lef him work an a go up deh but de gal tell him not to come cause a MoBay she deh.
Raga, all now de man can't see nuh baby. All now de gal a call de man an a demands money fi de pickney, weh de man neva see yet! Raga she went as far as tell de man seh she a go bring him go court fi maintenance.
De man all went up there fi get de baby cause him mother & other relative want to know the baby. Raga, de gal come to har fren stall without the baby saying the baby deh a day care & bout because she a go a work she cyaan turn back fi go a de day-care centre wid them fi see the baby.
Yuh know a seh a man like him mek woman believe seh dem can tek big man fi eediat. How di baxside him fi a mind baby mada an him neva yet see har wid a belly! How him fi a link him relatives fi come see pickney weh him neva see yet? 'Eediat' and 'fool' a names weh too good fi him. Some man a real clown to di ting. An mi doan even know wa fi say bout di gyal weh him have up, cause part a mi a say shi wicked, an a next part a say shi fi sen di fool a likkle further. Di bredda is a real klaffy yow. Cho!
Former Supermodel Mix-Up
Boy Raga, mi kinda reluctant but mi afi share da one ya bout d former supermodel who tun inna super nutten ya now. One piece a hottaclaps ina d scheme behin mi yaad dis mawnin between she an her bigamist/cokehead estranged husband caz she mussy a file fi divorce, tru im naa support him daughter.
An d hottes ting bout it a wen d gal colla d old dutty wukliss man him have d nerves fi a run in a room an lock door an a beg im mumma fi call police, d same madda whe him did a cuss an class caz she did a threaten fi put im out last night. Raga, a one piece of sumting. To how di former supermodel pop dung it look like life run out an done pan she. No sah, har shape still a hold eno Raga, but evri ting else drop off.
Di beta mix-up ya now, yes, di mix-up within di mix-up uncle Raga, d man nuh go hype off pon her how him sell $1.5 million sort out to one a im mumma fren! It look like a tru caz im vehicle upgrade. Jah kno it sticky pon dem like a pad back!!!
DWL@ 'pad back'. Yuh a sample yow! But mi know di former supermodel still. Di whole a Jamaica know har. A good gyal. Shi guh through nuff tings and a whole heap a struggles. Is a pity say dem tings ya reach har. Mi hope shi can buil back still. Bless up.
